刘半农·山歌

山歌

　　（用江阴方言）

　　郎想姐来姐想郎，
　　同勒浪一片场浪乘风凉。
　　姐肚里勿晓的郎来郎肚里也勿晓的姐，
　　同看仔一个油火虫虫飘飘漾漾过池塘。

　　＊

　　姐园里一朵蔷薇开出墙，
　　我看见仔蔷薇也和看见姐一样。
　　我说姐儿你勿送我蔷薇也送个刺把我，
　　戮破仔我手末你十指尖尖替我绑一绑。

　　＊

　　劈风劈雨打熄仔我格灯笼火，
　　我走过你门头躲一躲。
　　我也勿想你放脱仔棉条来开我，
　　只要看看你门缝里格灯光听你唱唱歌。

　　＊

　　你叫王三妹来我叫张二郎，
　　你住勒村底里来我住勒村头浪。
　　你家里满树格桃花我抬头就看得见，
　　我还看见你洗干净格衣裳晾勒竹竿浪。

　　＊

　　你联竿窱窱乙是窱格我？
　　我看你杀毒毒格太阳里打麦打的好罪过。
　　到仔几时一日我能够来代替你打，
　　你就坐勒树阴底下扎扎鞋底唱唱歌。

　　＊

　　五六月里天气热旺旺，
　　忙完仔勺麦又是莳秧忙，
　　我莳秧勺麦呒不你送饭送汤苦，
　　你田岸浪一代一代跑跑跑得脚底乙烫？

虚阁网(Xuges.com)